BIRMADUU MEDIA

Fakkeenyi goofta Keenyaa Yesuus Kirsitoos kan inni nu yaadachiisu waamichi Waaqayyoo nuuf godhee waamicha jireenya ayyaanaatti. Ayyaana gammachuu qabu akka cidaatti waamane. Waaqayyoo nama hundumaa nagaa, gammachuu fi fayyinatti waame. Akkuma abbaan cidaa ykn misirroon firoota isaa akka hirmaattu gammachuu isa ta’anii fagoo fi dhi’oo jiranii dhangaa ulfinaa qophessee waamuu Waaqayyo dhangaa hin bannee kan jireenyaa qophessee akka ayyaaneffannuuf itti nu waame. Waamicha gati qabeessa kanaaf baasii ykn harka fuudhii nu irraa barbaadu Waaqayyo hin qanu. Kan inni namoota irraa barbaadu fedhaa fi of kennuu isaanis qofa. Hata’u iyyu male akka fakkeenya kana irraa hubannuutti haala dhugaa biyya lafa fi jireenya namaa keessatti namni Waaqayyoo fedhuu fi of kennuun hedduu salphaa miti.

Dhama’iisi jireenya mo’achuu akkuma fakkeenya kana irraa agarre waamicha Waaqayyoo nama hundaaf godhe irraa kan nuu hanqisu ykn boodatti nu hanbisan akka ta’e argina. Akka fakkeenya kanatti hedduun namoota waamamanii kan isaan argamuu hin dandeenyeef muddaama jireenyaan waanta qabamanii jiraniifi. Inni kan qonnaaf, inni kaan kan du’e awwaaluuf, inni kan immoo horii isaa ilaallachuuf waanta muddamee jiruuf waamicha gooftaa isaanii kana irratti argamuu hin dandeenye. Waanti isaan itti qabaman kunis wanta hamaa hin turre, waanuma qajeelaa namni jireenya isaa ittin biyya lafaa kan irratti mo’atee jiraatuudha. Namni yoo hin hojjenne, yoo hin qonne, yoo du’aa hin awwaallanne jireenyi nama jireenya ta’uu hin danda’u.

Waanti heddu nama gaddisiisu garu dhama’isuma jireenya mo’achuu isa qajeelaa ta’ee jiru kanatu isa hundumaa caalu hundee jireenyaa, nagaa fi fayyinaa nu jalaa dhoksa. Hedduun keenya qalbii keenyaa fi hafuurri keenya waanta waa’ee dhama’ina jireenyaan qabameef, jireenya isa itti waamaneef yeroo hin qabnu. Qalbiin keenya muddama jireenyaan wanta qabameef isa dura aanuu male jireenya, kan foonis ta’e hafuuraaf, yeroo hin qabnu. Sagaleen Waaqayyo garu kan nu barsiisu, Waaqayyo dhama’ina duwwaaf nu hin uumne, jiraachuuf, keesaa iyyuu jireenya irraa hafa akka jiraannuf malee. 

Namni dhma’ina isaan horii horachuu, beekumsa qabaachuu tarii firoota horachuu danda’a. Jireenya, nagaa waaraa fi gammachuu guutu garuu waaqayyotu namaaf kenna. Kanas hudumti keenya garaa keenya kessati beekna. Wanta hundumaa utuu qabnuu yaadi keenya hin rafu, waanta nyaannu out qabnuu garaan keenya hin quufu, jireenyaaf otuu dhamaanuu jireenya dhamaanuf otuu hin jiraattin yeroon keenya gara xumuraatti saffisaan fiigdi. Tarii kana hundumaas sababa hedduu dhi’eessu dandeenya ta’a. Jarri warri gooftaan isaanii maaddi ga’a ulfinaa qopheessee isaan waame hafuu isaaniif sababa hedduu akka dhi’eessan arginnerra.

Waqayyo jireenya guutu fi gammachuu, akkasumas jaalalaa nuuf kennuuf gara keenya dhufe. Tarii ar’a jireenya inni nuuf fidee dhufe simannee akkasumaan gati tokko malee akka harkaa fudhannee ararra isaa kessa akka hin jireennef sababa nuti dhi’eessinu maali?  Akka nuti tokkummaa amantootaa, lafa itti Waaqayyon gochaa isaaf galateffannu, akkasumas sagalee isaa irra wal jajjabeessinu irraa kan nu ittisan maal lata ? Waaqayyo inni akkasumaan nu jaallate, inni nutti hin faranne, irrina keenyaa fi dadhabina keenya beeku ara’as gara maaddi isaatti nuwaama!

Ara’a haaraan arraa kun nu hunduma keenyaaf carraa itti waa’ee jireenya keenyaa itti xinxallee ilaallu fi waamicha waaqayyo harka isaa ballisse nuuf godhuuf debii lannu dhaa. Waaqayyo akkasummatti hawwaa fi dhama’ina jireenyaan akka umurii keenya fixnuu hin barbaadu. Akka isa hundumaa caalu jireenya dhaqdhamnee, ar’a asitti itti jiraannuuf akkasumas jireenya kana garasiittii.